Днём актыўнага калектыўнага адпачынку для кіраўнікоў арганізацый аграпрамысловага комплексу стала пятніца, першага ліпеня. Іменна на гэту дату яго арганізатарамі – упраўленнем па сельскай гаспадарцы і харчаванні райвыканкама, райкамам прафсаюза работнікаў АПК і раённым аграсаюзам - было запланавана правядзенне раённага конкурсу рыбалоўнага майстэрства “Удача на кручку”.

Па ўмовах спаборніцтва кожны з удзельнікаў мог мець у сваім арсенале адну паплавочную вудачку і два фідары, на што, уласна, і лавіў рыбу. А на гэтую адказную справу рыбаловам-аматарам выдзялялася роўна тры гадзіны, пасля чаго прадстаўнічае журы падвяло вынікі і назвала лепшых. На жаль, фартуна не была вельмі літасцівай да канкурсантаў і надта важкім уловам пахваліцца не мог ніхто. Тым не менш, сваіх лідараў спаборніцтвы выявілі.

У намінацыі “Лепшы ўлоў” найбольш пашанцавала кіраўніку ААТ “Першамайскі” Юрыю Касцюку. Другое і трэцяе месцы заваявалі дырэктар філіяла племпрадпрыемства Уладзімір Гарошка і дырэктар ААТ “Багушэвічы” Юрый Сухоцкі. Яны адзначаны кубкамі, дыпломамі і каштоўнымі падарункамі. Не менш важкі каштоўны падарунак быў уручаны і дырэктару ПМС Мікалаю Куксёнку. Ён вызначыўся ў намінацыі “BIG FISH”.

Не засталіся пакрыўджанымі і астатнія ўдзельнікі першынства (дарэчы, у стройных радах мужчын-рыбаловаў аказалася і адзіная прадстаўніца жаночага полу – дырэктар райветстанцыі Марына Самец), бо кожны з іх змог добра адпачыць у той дзень і зрабіць невялікі перапынак для таго, каб затым ізноў прыступіць да сваіх штодзённых няпростых клопатаў.

Асабліва арганізатары і ўдзельнікі спаборніцтваў былі ўдзячны адміністрацыі УП “АграМАЗ”, якая для правядзення мерапрыемства прадаставіла цудоўнае возера ў в. Мачаск з абсталяваным там месцам адпачынку.

Анатоль ПАЛЫНСКІ.