За адказам мы звярнуліся да дырэктара філіяла “Аўтапарк №22” ААТ “Мінаблаўтатранс” Артура Новікава.

- Сапраўды, падобныя факты час ад часу здараюцца. І гэта, безумоўна, адмоўна ўплывае на імідж нашага калектыву, які мы імкнёмся падтрымліваць сваімі добрасумленнымі адносінамі да выканання справы. Атрымліваецца гэта не заўсёды. Віной усяму – частыя паломкі аўтобусаў па тэхнічных прычынах.

Прадугледзець іх немагчыма, нягледзячы на тое, што слясарная служба і самі вадзіцелі пастаянна клапоцяцца аб спраўнасці транспартных сродкаў. У падобных выпадках наша дыспетчарская служба інфармуе работнікаў аўтавакзала аб няспраўнасці з тым, каб тыя данеслі гэтую інфармацыю пасажырам. Паралельна з гэтым мы прымаем усе неабходныя меры для хутчэйшага выпраўлення паломкі.

Іншы раз здараюцца яны і па шляху руху аўтобуса прама на лініі, што прыводзіць да зрыву графіку руху аўтобуса на маршруце.

Выправіць сітуацыю павінна набыццё сёлета да канца лета двух новых аўтобусаў, якія прызначаны для абслугоўвання прыгарадных маршрутаў.