Не спяшайцеся даваць адмоўны адказ, бо хутчэй за ўсё вы звярталіся сюды на працягу існавання гэтай арганізацыі, калі яна яшчэ насіла назву “Сельэнерга” або “Аграпрамэнерга”.

Адбылася не толькі замена лагатыпу, але і некаторыя іншыя перамены арганізацыйнага ўтварэння і падпарадкавання вышэйстаячым установам. А вось напрамак дзейнасці і выконваемыя функцыі засталіся ранейшымі: ажыцццяўленне мантажных работ і электрафізічных вымярэнняў.

Але захаваліся не толькі віды выконваемых работ, а і некаторыя працаўнікі былога складу арганізацыі. І роўных у гэтым плане няма Івану Балігатаву, які нязменна шчыруе ў калектыве з 1989 года.

Нягледзячы на тое, што пры ўладкаванні сюды ён за плячыма меў дыплом (закончыў профільны тэхнікум), сваю кар’еру ў энергетыцы пачынаў са звычайнага электрыка. Затым была пасада майстра, а зараз Іван Барысавіч вось ужо колькі гадоў з’яўляецца галоўным інжынерам “ТэхЭнергаМантажа”.

- За гэты час перажыць давялося многае. Асабліва цяжкім быў перыяд крызісу 90-х гадоў, калі было шмат праблем з аб’ёмамі выконваемых работ, нясвоечасовай аплаты за іх, адсутнасці сродкаў на выплату зарплаты. Уявіце сабе: для таго каб выжыць арганізацыі, нашы рабочыяэлектрыкі нават збівалі паддоны.

І нам удалося захаваць калектыў, не ліквідавацца. Праўда, зараз ён не такі шматлікі, як раней, калі працуючых было больш за сотню чалавек. Сёння ў штаце толькі шэсць электрыкаў ды некалькі работнікаў адміністрацыі, адпаведна сталі меншымі і аб’ёмы выконваемых работ.

Тым не менш, арганізацыя дзейнічае і актыўна працуе, аказваючы паслугі як прыватным грамадзянам, так і юрыдычным асобам.

Істотнай нагодай звярнуцца менавіта да гэтай арганізацыі з’яўляецца і наступны факт: калі работы па ўстаноўцы электракатла выконвае дзяржаўная арганізацыя (а “ТэхЭнергаМантаж” менавіта такой і з’яўляецца), то паводле ўказа Прэзідэнта Рэспублікі Беларусь, частка затрачаных на гэтую справу сродкаў (набыццё абсталявання і аплата за работу па яго мантажы) гаспадару вяртаецца з дзяржаўнага бюджэту.

Калі гэта працуючы чалавек, сума кампенсацыі складае 20, для непрацуючых яна павялічваецца да 40 працэнтаў.

- На жаль, мала хто ведае пра гэта, - дадае Іван Балігатаў, - вось і трапляюць на вудачку прыватнікаў. А навошта губляць з тысячы 200 або 400 рублёў?

Звяртаюцца сюды некаторыя бярэзінцы не толькі з просьбай аб устаноўцы катла. Іншы раз заяўнік прыходзіць толькі з гатовым праектам, каб спецыялісты самі падабралі найбольш спрыяльны варыянт катла, набылі неабходныя дадаткі да яго, каб самому не бегаць у пошуках і не памыліцца ў час выбару той ці іншай мадэлі.

Станоўча адгукаюцца тут і на такі варыянт вырашэння праблемы. А дапамагае ў гэтым, своечасова дасць слушную параду, прыме заяву да разгляду, ажыццявіць разлік за выкананую работу Іван Балігатаў – выдатны спрактыкаваны спецыяліст, уважлівы суразмоўца, які вызначаецца станоўчымі адносінамі да людзей, пачуццём гумару і міралюбівым характарам.

Анатоль ПАЛЫНСКІ.
Фота аўтара.