Крысціну Васільеўну не назавеш маладым спецыялістам, пра яе дакладней будзе сказаць «пачынаючы», бо закончыла яна сельскагаспадарчую акадэмію не сёння. За яе плячыма ўжо істотны працоўны стаж і вопыт работы ў якасці эканаміста ў ААТ «Бярэзінскі», а пасля яго далучэння – у ААТ «Пагосцкі». Яно і зразумела: сама яна мясцовая, пражывае ў Косаўцы ў прыватызаваным доме, гадуючы з мужам дваіх сыночкаў. Усё дагледжана ў руплівай гаспадыні – і сям’я, і дзеткі, і падворак, на якім з ранняй вясны да позняй восені пераліваюцца колерамі вясёлкі шматлікія кветкі. Ды і ў хлеўчуку няпуста. Тут рохкаюць два кабанчыкі.

– Безумоўна, займаць такую адказную пасаду зусім няпроста, – дзеліцца думкамі жанчына. – І хаця я і раней працавала з лічбамі, у новай спецыяльнасці ёсць шмат адрозненняў ад абавязкаў эканаміста. Паступова спасцігаю новую ролю. Ды і наша Наталля Аляксандраўна заўсёды прыходзіць на выручку, дапамагае ўнікнуць у самыя таямніцы справы.

Але гэта – не адзіны фронт работы Крысціны Паддубскай. Яшчэ будучы на ранейшым месцы работы, яна ўзначальвала пярвічную прафсаюзную арганізацыю «Пагосцкага». Аўтаматычна перабраўся гэты пост за жанчынай і ў «Брадзец». І Крысціна Васільеўна ніколькі не наракае на такую грамадскую нагрузку. У меру свайго жвавага характару і ўмення сыходзіцца з людзьмі, яна даволі хутка змагла праявіць сябе і як прафсаюзны лідар. Арганізоўвала экскурсійныя паездкі, адной з першых у раёне правяла сёлета акцыю «Наш жывёлавод»,
шмат надае ўвагі захоўванню тэхнікі бяспекі і ўмоў працы рабочых, імкнецца заўсёды быць патрэбнай людзям і ісці ім на дапамогу, а пры неабходнасці – і адстойваць іх правы.

– Кажуць, што за жыццё сапраўдны мужчына павінен пабудаваць дом, пасадзіць дрэва і выгадаваць сына, – усміхаецца мая суразмоўца. – А вось у жанчын галоўнымі трыма фактарамі іх станаўлення з’яўляюцца, на мой погляд, надзейны муж, годныя дзеці і любімая работа. А яшчэ надзейны сямейны тыл, які грунтуецца на цеплыні дамашняга ачага, а таксама адчуванне матулі, без чаго сям’я не будзе паўнацэннай. Усе гэтыя складальнікі ў мяне ёсць. Такім чынам, я магу сябе лічыць шчаслівай. А жанчынам напярэдадні свята жадаю здароўя – асабістага, блізкім і дзецям. Няхай ажыццяўляюцца вашы смелыя жаданні, няхай заўсёды будзе ў вас светлы веснавы настрой і здзяйсняецца ўсё тое, чаго кожны сабе жадае.

Анатоль ПАЛЫНСКІ.

Фота аўтара.