Духмяная і наварыстая, смачная рыбная поліўка – нагода выбрацца на прыроду, сабраўшыся разам. Дарэчы, гэту страву можна прыгатаваць не толькі на вогнішчы, а і дома. Прычым рэцэптаў юшкі існуе мноства на любы густ і фінансы.

Так што, калі вы хочаце парадаваць сваіх родных і блізкіх чымсьці новенькім, паспяшайцеся прыгатаваць рыбны суп па рэцэпце егера Бярэзінскай раённай арганізацыйнай структуры Беларускага таварыства паляўнічых і рыбаловаў Міхаіла Яблонскага.

Акунь, судак, шчупак – ідэальны варыянт для падрыхтоўкі класічнай юшкі з рачной рыбы. Такая карысная страва адназначна спадабаецца і дарослым, і дзецям.

Інгрэдыенты:

Свежая рачная рыба - 800 г;

Бульба - 2-3 шт.;

Морква - 1 шт.;

Цыбуля рэпчатая - 1 шт.;

Кроп і пятрушка - 5-6 галінак;

1 літр вады;

Лаўровы ліст - 1-2 шт.;

Соль па гусце.

Спосаб прыгатавання:

Рыбу трэба ачысціць ад лускі, выдаліць жабры, вытрыбушыць, прамыць халоднай вадой і нарэзаць буйнымі кавалкамі. Калі рыба дробная, то выкарыстоўваць цалкам.

Моркву і бульбу нарэзаць сярэднімі кавалкамі. Цыбуліну можна пачысціць, але я не чышчу, тады шалупіна надае юшцы аранжавы колер, і перац чорны гарошкам не дабаўляю, каб захаваць такі колер. Гэта, як цяпер кажуць, мой лайфхак.

Далей дробна нарэзаць зеляніну. У вядры ці глыбокай каструлі закіпяціць ваду, пакласці ў кіпень моркву, бульбу, крышку пазней – цыбулю. Варыць 15-20 хвілін да мяккасці гародніны. Пасля дадаць рыбу і спецыі. Варыць яшчэ 7-15 хвілін. Пасля дастаць цыбуліну і пасаліць поліўку.

Перад падачай упрыгожыць свежай зелянінай. Смачна есці!