“Калі звычайны плоў павінен быць рассыпчатым, “рысінка к рысінке”, то ў шылаплаві, – гаворыць ён, – наадварот, рыс разварваецца да стану вадкай кашы. Правільныя суадносіны круп і вады 1:5. Для патрэбнай кансістэнцыі выкарыстоў-ваюць круглазярністы рыс, часам нават рысавую сечку. Шылаплаві па-грузінску рыхтуюць з маладой бараніны – гэта класічны варыянт, але ёсць рэцэпты з курынымі кумпячкамі або грыбамі (падчас пастоў). Вельмі смачна выходзіць. Паспрабуем прыгатаваць?

Інгрэдыенты:

• Бараніна (мякаць з рэбернай часткі, або курыныя кумпячкі, або грыбы) – 500 г,
• рэпчатая цыбуля буйная – 2 шт.,
• рыс круглазярністы – 350 г,
• рэберны тлушч – 50-100 г,
• молаты кмен – 0,5 ч. л. ці больш,
• чорны перац – 0,5 ч. л. ці больш,
• зеляніна, лаўровы ліст, спецыі, соль – па гусце,

• вада – прыкладна 1,5-2 л.

Прыгатаванне:

У першую чаргу трэба разрэзаць бараніну (ці падрыхтаваць курыныя кумпячкі або грыбы). Абавязковая ўмова – свежае мяса, пажадана маладое і без паху, яно зварыцца хутчэй і не будзе цвёрдым. З рабрынак бараніны вагой 1 кг зняць мякаць, тлушч, костачкі выкарыстоўваем для булёну. Рабрынкі – у каструлю, дадаём кавалачак сельдэрэя, хвосцікі ад кінзы, лаўровы ліст, некалькі гарошын чорнага і духмянага перцу, цэлую цыбуліну, заліваем вадой і рыхтуем булён (варым гадзіну-паўтары). Мякаць бараніны трэба нарэзаць невялікімі кавалачкамі. Рэберны тлушч здрабніць маленькімі кубікамі або пракруціць на мясарубцы. Затым спатрэбіцца казан ці іншы посуд з тоўстымі сценкамі і дном. Разаграваем да максімуму і выпальваем кавалачкі барановага тлушчу. Скваркі, якія не растварыліся, выкідваем. Калі бараніна вам трапілася без лішняга тлушчу, то выкарыстоўвайце рафінаваны алей – спатрэбіцца палова шклянкі. Цыбулю нарэзаць кубікамі і абсмажыць у кіпячым тлушчы ці алеі хвілін 10. Цыбулі не шкадуйце, яе смела можна браць у суадносінах 1:1 з баранінай. Калі цыбуля стане мяккай, трэба дадаць агню і пакласці мяса. Смажыць на моцным полымі хвілін 7-10 (чым таўсцей, тым даўжэй, каб лішняя вадкасць вытапілася), амаль да паўгатоўнасці мяса. Калі бараніна падсмажыцца і збялее, варта дадаць у казан працэджаны булён (або гарачую ваду), кмен, соль, чорны молаты перац. Калі шмат тлушчу, то можна зняць 3-4 лыжкі лішняга тлушчу, які ўсплыве на паверхні. Колькасць спецый – па гусце. Калі ўсё закіпіць – засыпаць рыс, старанна прамыты ў некалькіх водах (да празрыстасці). Рыс лепш браць круглазярністы. Вадкасць павінна пакрываць крупы на 1-1,5 сантыметра. Варыць доўга, прыкладна 40 хвілін, рэгулярна памешваючы, пакуль не разваруцца крупы і мяса не дойдзе да поўнай гатоўнасці. У працэсе можна падліваць гарачую ваду або булён. Страва па кансістэнцыі павінна быць як вадкая каша.

Падаюць шылаплаві ў гарачым выглядзе. Можна пасыпаць зверху свежазмолатым чорным перцам, дапоўніць свежай агароднінай або саленнямі, кінзай.

Смачна есці!

Падрыхтавала Алена ГРОМАВА.