Не маем права забываць...

08.04.2025

redaktor1

156

Памяць аб Вялікай Айчыннай вайне і аб цане Перамогі надзейна жыве ў нашых сэрцах. Асаблівым болем гэтыя ўспаміны адгукаюцца ў душах старэйшага пакалення: хтосьці з гэтых людзей – дзеці ваяваўшых салдат, а хтосьці – і сам сведка бітваў больш чым 80-гадовай даўніны. Гады няўмольна забіраюць у нас жывых сведак тых падзей, але юнаму пакаленню застаецца мноства зафіксаваных успамінаў герояў вайны. А яшчэ – помнікі, брацкія магілы, мемарыяльныя комплексы, якіх нямала на зямлі нашай Радзімы.

Начальнік Бярэзінскага райаддзела па надзвычайных сітуацыях Іван Мазанік расказвае:

«Прыняць удзел у навядзенні парадку на брацкіх могілках і памятніках – тое нямногае, што мы можам зрабіць, каб ушанаваць памяць продкаў. Адно са шматлікіх страшных сведчанняў вайны – брацкая магіла ў вёсцы Жарамец Бярэзінскага раёна. Тут пахаваныя дваццаць байцоў Чырвонай Арміі, што загінулі ў баях у перыяд Вялікай Айчыннай вайны. Надмагілле не захавала іх імёны. Магчыма, у памяці сваіх родных яны навекі засталіся жывымі… Мы навялі парадак каля помніка, паслухалі аповед пра яго гісторыю, ушанавалі загінулых хвілінай маўчання. Ужо шмат пакаленняў пасляваеннага часу жывуць мірна, але памяць пра вялікія падзеі назаўсёды ў нашай памяці. І мы абавязкова будзем пра гэта распавядаць сваім дзецям».