Прыгажосць, вартая гаспадароў

23.08.2025

redaktor1

438

Хутка скончыцца лета. Аднак тых, хто працаваў на сваім прысядзібным участку, зараз радуе не толькі багаты ўраджай, але і створаная ўласнаручна прыгажосць.

У Любушанах, на падвор’і Мікалая і Тамары Вагура, каля веснічак высаджаны тры туі. Усё адна да адной, акуратна сфармаваныя. Насупраць акна размясцілася клумба, дзе растуць ружы, астры, цыніі. На ганку дома ў вазонах квітнеюць рознакаляровыя петуніі. З краю ўчастка – куст абляпіхі.

За домам, ва ўнутраным дворыку, ёсць невялічкая лазня. Крэслы, у якіх можна адпачыць. Пясочніца з лялькамі для гадавалага ўнука.

– Пладовыя дрэвы мы падразаем, белім, – дадае гаспадыня. – Ёсць у нас і агарод. Тут усяго патрошку: кабачкі, бульба, цыбуля, агуркі, перцы. Мы з мужам не лянуемся працаваць на ўчастку, бо знаходзімся цяпер на заслужаным адпачынку. У дызайнерскім пытанні шмат чаго падказвае інтэрнэт. Хаця яшчэ з дзяцінства я добра малявала. Гэта дапамагае ствараць утульнасць на нашым участку.