– На прадпрыемстве я з 1979 года, – гаворыць Анатолій Уладзіміравіч. – Як прыйшоў пасля арміі на завод, так з ім нібы і зрадніўся. Свае першыя рэйсы рабіў на “Газоне”, 15 гадоў “прабеглі” за рулём ГАЗ-53. Потым шчыраваў на “МАЗе”, у 2021-ым годзе перасеў на новы “МАЗ”.

Анатолій Уладзіміравіч штогод актыўна ўдзельнічае ў нарыхтоўцы, перавозцы збожжа, а таксама ў грамадскім жыцці арганізацыі.

– Вельмі мне запомнілася, як прымаў удзел у святочным шэсці ў Дзень Незалежнасці Рэспублікі Беларусь, – гаворыць ён, – на сваім ЛуАЗе (аўтамабіль вытворчасці Луцкага аўтазавода (Украіна). Прыўзняты настрой, маштабнасць святкаванняў... Вельмі запамінальныя моманты на ўсё жыццё...

З 1997 года Анатолій Уладзіміравіч вядзе асабістыя дзённікі, дзе адлюстроўвае дні свайго жыцця – паспяховыя і не вельмі. Шмат тут пра рыбалку, бо Анатолій Уладзіміравіч – заўзяты рыбак.

– Вось, напрыклад, – чытае ён свае запісы, –“2023 год. 1 студзеня. Затока (у межах Арэшкавіч). Прыгожая рыбалка. Прырода! Рыба клюе”. “18-19 лютага. Рыбалкане адбылася. Паклёўкі былі, рыбкі – няма”.

У тоўстым сшытку ўмяшчаецца сем гадоў жыцця, а ў паўагульным – чатыры.

І працяг – будзе...