Каленік Таццяна Рыгораўна нарадзілася ў 1965 годзе ў горадзе Беразіно Мінскай вобласці. 

У школьныя і студэнцкія гады праявіла сябе ў розных творчых напрамках: мастацтва, вакал, музыка (баян). Займалася ў студыі бальнага танца, стварала тэатралізаваныя прадстаўленні. Аднак працоўны шлях пачала з пасады загадчыцы малочнатаварнай фермы – марыла стаць ветэрынарным урачом. Чарада трагедый, якая здарыліся ў сям’і Таццяны Рыгораўны, нібыта блакіравала яе магчымасці на доўгі час.

Абудзіла ж іх творчая натура малодшай дачкі Ганны. Неўзабаве ў мастацкіх галерэях «Славутыя майстры Беларусі», «Падземка», у Канцэртнай зале «Мінск» з’явіліся вырабы з ільну і бяросты, створаныя рукамі Таццяны Каленік.

Першыя вершы і эсэ ў аўтарскім выкананні прагучалі на творчых пляцоўках горада. З’яўляючыся адной з вядучых творчых праектаў «Сябрына» і «Рэзананс», стварала сцэнарыі і дэкарацыі да музычналітаратурных імпрэз, арганізоўвала мастацкія выставы. Новыя гарызонты адкрыла праца ў Дзяржаўным літаратурна-мемарыяльным музеі Якуба Коласа, работа на пасадзе галоўнага спецыяліста Мінскага абласнога аддзялення Саюза пісьменнікаў Беларусі (2020-2022 гг.), работа ў складах журы, удзел у літаратурных і культурных святах нашай краіны.

Зараз Таццяна Каленік з’яўляецца супрацоўніцай сталічнай бібліятэкі № 3 імя Уладзіміра Маякоўскага, кіруе літаратурным аб’яднаннем «Слова». Яна ладзіць інтэрактыўныя сустрэчы са школьнікамі і наведвальнікамі бібліятэк, прэзентацыі кніг, літаратурна-музычныя вечарыны. Празаік, член Саюза пісьменнікаў Беларусі, лаўрэат VII Міжнароднага літаратурна-музычнага фестывалю «Інтэлігентны сезон» у двух намінацыях «Малая проза» і «Ілюстрацыя кніг», дыпламант літаратурнага конкурсу «Бацькаўшчына светлая мая» ‒ сумеснага праекта Першага нацыянальнага канала Беларускага радыё і часопіса «Маладосць».

Яе творы друкуюцца ў калектыўных зборніках, у замежных перыядычных выданнях, на старонках часопісаў «Полымя», «Маладосць», «Гаспадыня», «Вясёлка», «Друг пенсионера», у газеце «Літаратура і мастацтва», раённых газетах. Рознабаковая творчая дапытлівасць Таццяны Каленік не дазваляе ёй спыніцца на чымсьці адным з яе магчымасцяў. Апошнім часам яна рупіцца і на дызайнерскай ніве ‒ малюе і афармляе кніжныя вокладкі, ілюструе кнігі беларускіх і замежных пісьменнікаў, з’яўляецца аўтарам і дызайнерам паштовак і буклетаў мастацка-літаратурнага напрамку, стварае лялек да твораў беларускіх літаратараў. Усё, што адбылося з пісьменніцай за апошні, дастаткова кароткі перыяд, акрыляе і натхняе яе.

Абуджае і Слова продкаў, якое нясе Таццяна Рыгораўна да нашчадкаў. Гэта адчувальна ў яе кнізе «Бабуліны шпулькі» ‒ своеасаблівым помніку малой радзіме. Ілюстраваць кнігу аўтар запрасіла школьнікаў вясковых і гарадскіх адукацыйных устаноў Міншчыны і Магілёўшчыны, спадзеючыся, што хлопчыкі і дзяўчынкі ‒ удзельнікі праекта ‒ з яшчэ большай адказнасцю пачнуць ставіцца да культуры і традыцый роднага краю, да чалавека. Яна спрабуе дастукацца да сэрца кожнага чытача, вярнуць яго да сябе, да сваіх Вытокаў.

Гэта так важна сёння, калі губляецца сувязь чалавека з прыродай, з родам, з сапраўднымі духоўнымі каштоўнасцямі. Каб не спыніўся рух.

Березинская центральная районная библиотека