Аддзяленне дзённага знаходжання для грамадзян пажылога ўзросту Бярэзінскага ТЦСАН нарэшце атрымала пастаянную прапіску ўжо ва ўласным памяшканні ў будынку па вуліцы Кастрычніцкай, там, дзе раней размяшчалася служба землеўпарадкавання.

Надвор’е не спыніла наведвальнікаў клуба сабрацца разам на святочнае мерапрыемства і правесці чарговае пасяджэнне ў новым памяшканні.

Пад гармонік і прыпеўкі Тамары Дземяшкевіч стужку перарэзала намеснік начальніка ўпраўлення па працы, занятасці і сацыяльнай абароне насельніцтва райвыканкама Святлана Сайкоўская. Ва ўрачыстай прамове яна зазначыла, што рамонт памяшканняў зроблены рукамі супрацоўнікаў ТЦСАН, якія паставіліся да справы з асаблівай увагай і стараннем, і павіншавала прысутных з наваселлем.

Дарэчы, пажылых людзей у аддзяленні дзённага знаходжання чакаюць музычны, спартыўны, камп’ютарны гурткі, клубы арт-тэрапіі, “Вясёлка жыцця”, “Краязнаўца”, “Гаспадыня”. Наведваюцца сюды на дагаворнай аснове 64 чалавекі.

Адзін з наведвальнікаў аддзялення Багдан Шаўчук з 1986 года працаваў у сістэме жыллёва-камунальнай гаспадаркі, з якіх 10 гадоў быў майстрам кацельні. Ніколі не губляў цікавасці да актыўнага ладу жыцця. Да гэтага года спявае ў фальклорным ансамблі “Лявоніха”, удзельнічае ў народным тэатры Бярэзінскага РЦК. Першую ролю ў спектаклі “Аперацыя Мнагажэнец” помніць, нібыта прэм’ера адбылася ўчора. 

- Спяваем, весялімся, успамінаем мінулае, - дзеліцца ўражаннямі Багдан Марціянавіч. –Паверце, і ў паважаным узросце можна знайсці для сябе годны занятак.

- Сярод нашых пастаянных наведвальнікаў ёсць такія людзі, якім па ўзросце ўжо больш за 80 гадоў, аднак яны вядуць актыўны лад жыцця, ходзяць у клубы, займаюцца ў гуртках, удзельнічаюць у выставах. Напрыклад, Мая Стэфанаўна Ладуцька, Мая Іосіфаўна Рабушка. І шмат іншых, пра каго можна многа расказаць, - расказвае загадчыца аддзялення Наталля Сікірыцкая. – Сённяшні ж дзень для нас усіх даволі ўрачысты. Атрымаць уласнае памяшканне гэта значная падзея, бо раней арэндавалі пакоі ў ФОЦ “Лазурный” і дзіцяча-юнацкай спартыўнай школе алімпійскага рэзерву. Прыемна ўбачыць у нас у гасцях усіх пажылых людзей Бярэзіншчыны. Дзверы адчынены для ўсіх жадаючых, каму за 60. Калі ласка, заходзьце да нас, разам весялей!

Аляксандр БЫЧКОЎСКІ.

Фота Алены ГРОМАВАЙ.