Адразу пачалі хваліць людзей: з пяці чалавек, што мы сустрэлі на першым «рыбным» месцы трое – у выратавальных жылетах. Адзін з іх, Мікалай Мікалаевіч, хваліцца ўловам і запэўнівае: калі што здарыцца з калегамі па занятку, паспеем выратаваць. Некаторыя людзі пакідалі лёд, калі заўважалі рэйдавую групу. Зразумела, што ненадоўга. У ходзе рэйду мы наведалі два месцы, пагаварылі пра бяспечныя паводзіны з дванаццацю чалавекамі.

Начальнік Бярэзінкага райаддзела па надзвычайных сітуацыях Іван Мазанік нагадвае:

«Варта памятаць, што праваліцца пад лёд – прасцей простага, а вось выбрацца атрымаецца не ў кожнага. Тым больш, калі на чалавеку няма выратавальнага жылету. Вось некалькі ключавых момантаў, якія дапамогуць вам пазбегнуць непрыемнасцяў і бавіць час на лёдзе максімальна бяспечна:

адносна трывалым лічыцца лёд таўшчынёй не менш за 7 см – гэта мінімальны паказчык, які дазваляе ўпэўнена перасоўвацца па паверхні;

блакітны лёд – гэта прыкмета надзейнасці і трываласці. Шэры, белы або з жаўтлявым адценнем лёд з'яўляецца ненадзейным і можа прадстаўляць сур'ёзную пагрозу для вашай бяспекі.

выратавальны жылет – асноўны «аксэсуар» рыбалкі. Апраніце яго і будзьце спакойныя!».