Варта адзначыць, што з пятнаццаці чалавек, якіх мы сустрэлі на першым «рыбным» месцы, толькі ў трох не было выратавальных жылетаў. Адзін з іх запэўнівае: калі што здарыцца з калегамі па занятку, паспеем выратаваць. Пра тое, што бяспечная таўшчыня лёду складае 7 сантыметраў, рыбакі ведаюць. Але ж запэўніваюць, што і пяці сантыметраў дастаткова пры ўмове адзіночнага знаходжання на ледзе. Іх не палохае, што лёд месцамі патрэсквае і правальваецца ля берага.

Дзмітрый Анцыпаў нагадаў кожнаму пра меры бяспекі на зімнем вадаёме, паказаў спосабы самаратавання пры надзвычайнай сітуацыі, уручыў наглядную прадукцыю. Для ўсіх аматараў падледнай рыбалкі ён нагадвае:

«Варта памятаць, што праваліцца пад лёд – прасцей простага, а вось выбрацца атрымаецца не ў кожнага. Нават у выратавальным жылеце! Вось некалькі ключавых момантаў, якія дапамогуць вам пазбегнуць непрыемнасцяў і бавіць час на лёдзе максімальна бяспечна.

Адносна трывалым лічыцца лёд таўшчынёй не менш за 7 см – гэта мінімальны паказчык, які дазваляе ўпэўнена перасоўвацца па паверхні.

Блакітны лёд – гэта прыкмета надзейнасці і трываласці. Шэры, белы або з жаўтлявым адценнем лёд  ненадзейны і можа прадстаўляе сур'ёзную пагрозу для вашай бяспекі.

Выратавальны жылет – асноўны «аксэсуар» рыбалкі. Апраніце яго і будзьце спакойныя!».