– А яны тут створаны, сапраўды, асаблівыя, – расказвае брыгадзір МТК “Капланцы” Таццяна Крывашэя-Дзамукашвілі. – У параўнанні з памяшканнем, дзе стаялі цяляткі раней, тут начыста адсутнічае іх скучанасць, заўсёды свежае паветра, шмат святла, клеткі для ўтрымання жывёлы ўтульныя, маюць дастатковыя памеры, яны заўсёды падасланыя. У кармушках пастаянна ў дастатковай колькасці ёсць камбікорм КР-1, самых маленькіх цялятак поім вадой, выпойваем малаком з вядзерцаў, аснашчаных соскамі. Палепшаны і ўмовы работы жывёлаводаў.
Памяшканне разлічана на пастаноўку 150 гадаванцаў ва ўзросце да трох месяцаў. Гэтую колькасць пагалоўя даручана даглядаць дзвюм цялятніцам – Ксеніі Бярозка і Настассі Савайтан. Яны – не навічкі ў сваёй справе і завіхаліся каля сваіх гадаванцаў яшчэ ў старым хлеве. Жачыны разлічваюць у будынку прафілакторыя дасягаць больш важкіх прыбаўленняў у вазе цялят і, што самае галоўнае і дзеля чаго, уласна, і задумвалася будаўніцтва, - істотна скараціць паказчык невытворчага выбыцця жывёлы і павялічыць працэнт яе захаванасці.
Названая праблема існуе ў многіх гаспадарках і адмоўна ўплывае на вытворчыя паказчыкі работы галіны жывёлагадоўлі. Таму яе станоўчае вырашэнне і выпраўленне сітуацыі знаходзіцца пад пільным кантролем не толькі спецыялістаў сельскай гаспадаркі. Вось і названы аб’ект быў узведзены ў адпаведнасці з распрацаванай Мінаблвыканкамам праграмай для сельгаспрапрыемстваў, якія маюць патрэбу ў будаўніцтве падобных прафілакторыяў. Фінансавыя сродкі на будаўніцтва аб’екта выдзеліў барысаўскі філіял “Здравушка-мілк” ААТ “Слуцкі сырзавод”, на які ААТ “Пагосцкі” пастаянна здавала сваю малочную прадукцыю.
Работы па ўзвядзенні новага памяшкання сельгаспрадрыемства вяло ўласнымі сіламі – намаганнямі будаўнічай брыгады. Працэс заняў няшмат часу і ўжо крыху больш месяца назад прафілакторый пачаў засяляцца. Для яго выхаду на “праектную магутнасць” у памяшканні яшчэ засталося ўстанавіць адзін рад клетак для маладняку. На комплексе не адмаўляюцца і ад практыкі ўстаноўкі клетак з цялятамі на вуліцы. Прыбягаць да такой меры тут будуць у выпадку масавых расцёлаў жывёлы і немагчымасці паставіць усіх нованароджаных цялятак у памяшканні прафілакторыя. Адмоўнага адбітку на самаадчуванні жывёлы быць не павінна, бо падобная сітуацыя можа назірацца ўжо з наступленнем больш цёплых веснавых дзён.
Пасля таго, як новае папаўненне маладняку БРЖ прабудзе ў прафілакторыі першыя тры месяцы свайго жыцця і дасягне адпаведнай вагавой катэгорыі, пагалоўе пераводзіцца на косаўскі адкормачнік гаспадаркі з тым, каб затым ізноў вярнуцца на комплекс або іншую ферму сельгаспрадпрыемства спачатку ў якасці цялушкі, якую затым перавядуць у “штат” асноўнага дойнага пагалоўя, а атрыманы прыплод трапіць у прафілакторый для таго, каб даць старт чарговаму цыклу аднаўлення і павелічэння пагалоўя ў гаспадарцы.
Анатоль ПАЛЫНСКІ.