На нарадзе прысутнічалі начальнік ўпраўлення па адукацыі, спорце і турызме, кіраўнікі ўсіх устаноў агульнай сярэдняй і дашкольнай адукацый, устаноў спецыяльнай адукацыі. Па выніках нарады былі дадзены канкрэтныя даручэнні, якія з’яўляюцца аба-вязковымі да выканання.
Разглядалася некалькі сітуацый сямей, якія знаходзяцца ў сацыяльна-небяспечным становішчы з асобных раёнаў вобласці, у якіх, на вялікі жаль, былі дапушчаны трагічныя сітуацыі.
На нарадзе акрамя прадстаўнікоў устаноў сістэмы адукацыі прысутнічалі кіраўнікі міжведамасных службаў, якія дзейнічаюць у рамках дэкрэта №18 Прэзідэнта Рэспублікі Беларусь, – гэта прадстаўнікі сістэмы аховы здароўя, Міністэрства па надзвычайных сітуацыях, следчага камітэта і камісіі па справах непаўналетніх.
Прадстаўнікі Дзяржынскага раёна і горада Жодзіна падзяліліся сваім вопытам работы па міжведамасным узаемадзеянні, расказалі і на канкрэтных прыкладах паказалі найбольш значныя формы работы з непаўналетнімі, якія гадуюцца ў сем’ях, што апынуліся ў цяжкіх сацыяльных умовах, падзяліліся вопытам укаранення названых практык у сваіх рэгіёнах.
Вопыт іх работы заслугоўвае ўвагі. І вядома ж, гэтая іх дзейнасць будзе ўзята на ўзбраенне педагогамі і ўпраўленнем па адукацыі, спорце і турызме Бярэзінскага раёна.
Акрамя гэтага, была прааналізавана сітуацыя па кожным з раёнаў Мінскай вобласці па колькасці сямей, якія знаходзяцца ў сацыяльна-небяспечным становішчы, па колькасці мнагадзетных сямей, якія апынуліся ў названым становішчы, і зразумела ж, па сітуацыі, якая прыводзіць да таго, што дзеці прызнаюцца маючымі патрэбу ў дзяржаўнай абароне.
Сёння асноўная мэта міжведамаснага ўзаемадзеяння – гэта недапушчэнне стварэння сітуацыі ў сям’і, калі неабходна ў экстранным парадку адбіраць дзіця. Таму па даным напрамку ў Бярэзінскім раёне праводзіцца ўся неабходная работа. Дзейнічае каардынацыйны савет, на якім прысутнічаюць спецыялісты ўсіх міжведамасных службаў і ўпраўлення па адукацыі, каардынуецца і абагульняецца ўся інфармацыя па раёне, якая паступае сюды. Па кожным інфармаванні праводзіцца сацыяльнае расследаванне.
Калі аналізаваць работу на Бярэзіншчыне за 9 месяцаў, то ва ўпраўленне па адукацыі, спорце і турызме паступіла 114 інфармаванняў. Па выніках кожнага інфармавання праведзена сацыяльнае расследаванне, 46 з іх пацверджана. На 1 кастрычніка 111 непаўналетніх Бярэзіншчыны з 43 сямей знаходзяцца ў сацыяльна-небяспечным становішчы. Прычым, больш 70 працэнтаў гэтых сямей – мнагадзетныя.
Іван Маркевіч:"Такога больш не павінна паўтарыцца, трэба актывізавацца па ўсіх напрамках. У нас сёлета 328 дзяцей паўторна прызнаны асобамі, якія знаходзяцца ў сацыяльна-небяспечным становішчы. Наша задача – абараніць іх".
Вельмі хацелася б спыніцца на такім моманце, які закрануў у час нарады Іван Станіслававіч Маркевіч. Ён датычыцца таго, што бацькі, якія не могуць або не хочуцць стварыць належныя ўмовы для сваіх непаўналетніх дзяцей (калі гаварыць пра Бярэзінскі раён, то такіх у нас 10), у сваёй пераважнай большасці не працуюць і пражываюць або за кошт дзіцячых дапамог, або за кошт сваякоў. А такога быць не павінна.
Таму ўпраўленне па працы, занятасці і сацыяльнай абароне і ўсе міжведамасныя службы ў рамках работы з сем’ямі, якія знаходзяцца ў сацыяльна-небяспечным становішчы, будуць прымаць усе меры, каб працаўладкаваць такіх бацькоў, каб яны мелі даход для стварэння належных і неабходных умоў для сваіх непаўналетніх дзяцей.
Стан, у якім утрымліваюцца непаўналетнія дзеці, знаходзіцца пад пільным кантролем, і гэтая работа будзе прадаўжацца на рэгулярнай аснове. Раўнадушных у гэтай справе няма і не будзе.
У чацвер адбылася відэанарада пад кіраўніцтвам намесніка старшыні Мінаблвыканкама Івана Маркевіча на тэму міжведамаснага ўзаемадзеяння па прафілактыцы сямейных неспрыяльных ўмоў, гібелі непаўналетніх ад знешніх прычын. У абласной студыі ў абмеркаванні вострай тэмы прымалі ўдзел кіраўнікі сістэмы аховы здароўя і адукацыі аблвыканкама, абласнога ўпраўлення Міністэрства па надзвычайных сітуацыях, следчага камітэта Мінскай вобласці, намеснік старшыні камісіі па справах непаўналетніх Мінскага аблвыканкама. У раённыя студыі з гэтай нагоды прыбылі намеснікі старшыняў райвыканкамаў па сацыяльнай сферы, дырэктары школ. У цэнтры асаблівай увагі знаходзіўся трагічны выпадак гібелі дзяцей на пажары ў г. Барысаве. Час разабрацца, хто вінаваты і што неабходна рабіць, каб дзеці не гінулі.
Алеся ЦІТОВА,
начальнік упраўлення па адукацыі, спорце і турызме райвыканкама.