– Людзі ў нас свядомыя ў плане грамадзянскай актыўнасці. Усе работнікі, задзейнічаныя на ўчастку, працуюць зладжана і арганізавана, – запэўніла старшыня ўчастковай камісіі Галіна Бабровіч. – У нас сёлета два чалавекі, якія галасуюць першы раз. Для іх рэферэндум – знакавая падзея ў жыцці.

– Дарэчы, у Капланцах заўсёды пры датэрміновым галасаванні людзі актыўна прыходзіць, – кажа намесніца старшыні камісіі Раіса Савайтан. – Тут побач школа, магазін, таму вельмі зручна. Ідзеш па справах, калі ласка, не праходзь міма, завітай і аддай свой грамадзянскі доўг.

І людзі ідуць. Самая “гарачая” пара для ўчастковай камісіі выпадае на першую палову дня. Чарговы наплыў варта чакаць вечарам.

Прысутнічаюць і назіральнікі ад розных грамадскіх аб’яднанняў Аляксандр Антанюк, Марына Дубіна, Павел Андрончык.

У пакоі побач з абсталяванымі “кабінкамі” стаіць асноўная апячатаная ўрна для датэрміновага галасавання. Побач – падрыхтаваныя ўрначкі для галасавання на даму, з якімі камісія 27 лютага завітае да тых, хто не змог па розных прычынах з’явіцца на ўчастак.

– Упэўнена, што на нашым участку рэферэндум адбудзецца без праблем. Тым больш, што выкананыя ўсе заканадаўчыя нормы, – заўважыла назіральнік Марына Дубіна. – Ва ўсіх бадзёры настрой, і людзі нацэленыя на вынік.

Аляксандр БЫЧКОЎСКІ.

Фота аўтара.