Госці ўстановы мелі магчымасць бясплатна наведаць пакой-музей драўлянай лыжкі, даведацца аб гісторыі стварэння гэтага  прадмета нашага ўжытку, пазнаёміцца з выстаўленымі экспанатамі і самім паспрабаваць пад кіраўніцтвам вопытнага разьбяра па дрэве, народнага майстра Беларусі Яўгена Восіпава стварыць сваю першую ўласную лыжку. Больш таго, у гэты дзень, наведаўшы яшчэ адзін майстар-клас, дзе чаравалі ўмельцы работы з глінай, можна было заняцца вырабам і керамічнай лыжкі! Пагадзіцеся, даволі ўнікальны выпадак.

Наведвальнікі мерапрыемства

Тым часам яшчэ ў адной зале таксама кіпела работа. Тут рабілі шпакоўні і іншыя домікі для птушак. Аб пералётных сябрах чалавека і стварэнні для іх належных “жыллёвых” умоў наведвальнікам мерапрыемства расказваў вельмі цікавы чалавек, знаўца многіх птушыных звычак – Барыс Барэль, у якога на ўчастку ў в. Неганічы ўстаноўлена звыш дзесяці шпакоўняў. А які ён адмысловы майстар па вырабе такіх домікаў! І кожны жадаючы мог дапамагчы майстру ў іх стварэнні. Тут жа была наладжана выстава работ праведзенага ў раёне з 15 па 31 сакавіка конкурсу на лепшую шпакоўню “Ды ажыве птушыны шчэбет”. Якіх толькі домікаў тут не было! Лічыце самі: пераможцы конкурсу адзначаліся па наступных намінацыях - за самую правільную і ўтульную хатку, за самую аргінальную шпакоўню, за самы крэатыўны дызайн гняздоўя, за самы казачны палац і за лепшую калекцыю хатніх работ.

Да канца дня дзверы цэнтра рамёстваў былі гасцінна адчынены для бярэзінцаў. І кожны, хто завітаў сюды на свята лыжкі, ніколькі не пашкадаваў аб патрачаным часе.

Анатоль ПАЛЫНСКІ.

Фота аўтара.