За апошні тыдзень інспектар прапаганды Бярэзінскага райаддзела па надзвычайных сітуаціях Вольга Ермакова наведала чатыры установы дашкольнага выхавання, каб у чарговы раз нагадаць дзеткам правілы ўласнай бяспекі. Гульня – найлепшы сродак падачы любой інфармацыі для дашкольнікаў. Гуляючы, дзеці авалодваюць надзвычай важнымі ведамі – што рабіць пры ўзгаранні, як пазваніць у пажарную, і - самае важнае – як сябе весці, каб не дапусціць вогненнай бяды. Выбіраючы на карцінках бяспечныя і небяспечныя месцы для гульняў, дзеткі наперабой тлумачылі свой выбар. Радасна топаючы і пляскаючы ў далоні падчас гульні “Топ-хлоп” яны паўтарылі, якія забавы радасныя, а якія – небяспечныя. Выбіраючы падчас мадэліравання сітуацый патрэбны нумар тэлефона, выхаванцы расказвалі, што яны паведамяць выратавальнікам па тэлефоне пры ўзнікненні пажара.