Як і ў мінулыя гады, у гаспадарцы робіцца стаўка на азімыя культуры. Тут пад ураджай гэтага года было пасеяна 225 гектараў ячменю, 400 гектараў пшаніцы, 550 гектараў трыцікале, пры гэтым пасяўныя плошчы пад гэтыя культуры былі павялічаны ў параўнанні з папярэднім годам. На ўзроўні ста гектараў толькі засталося азімае жыта. Узрасла і плошча, занятая кармавымі культурамі, у тым ліку і шматгадовымі травамі на ворыўнай глебе. У азімы клін таксама ўваходзяць 250 гектараў рапсу і 260 свірэпіцы на зялёны корм (яе плануюць запрасаваць у плёнку – атрымаецца канцэнтраваны высокабялковы корм), пасля чаго на яе месцы пасеюць пайзу – таксама каштоўную культуру.

Як адзначае галоўны аграном сельгаспрадпрыемства Аляксандр Шыбалка, у гаспадарцы свядома робіцца большы ўпор на кармы, як аснову развіцця жывёлагадоўчай галіны, якая штодзень мацуе эканоміку гаспадаркі. Таму яе развіццю і даецца “зялёнае святло”. Вырашчанае збожжа ў асноўным ідзе на выкананне дзяржзаказу, стварэнне насеннага фонду і на фураж. А вось стварэнне належнай кармавой базы для круглагадовага забеспячэння рацыёну жывёлы якасным травяністым кормам (не толькі кукурузным сіласам, а і сенажом) дасць магчымасць у спалучэнні з камбікармамі павялічыць узровень надояў і прыбаўленняў у вазе БРЖ.

Але вернемся да сёлетняй яравой сяўбы. Правесці яе належыць амаль на 1400 гектарах. Што хаваецца за такой значнай лічбай? Перш за ўсё, гэта 50 гектараў ранніх яравых збожжавых (20 гектараў аўса) і зернебабовых (30 гектараў лубіну). Будзе пасеяна таксама 40 гектараў грэчкі. Самая вялікая плошча адводзіцца традыцыйна пад кукурузу – 1100 гектараў (з іх сто гектараў – на зерне). А яшчэ крыху больш за 200 гектараў зоймуць аднагадовыя травы (пераважна гарох з аўсом).

Механізатар Дзяніс Тарасенка

Пакуль не надышоў час заняцца непасрэдна сяўбой, у “Здравушка-агра” вядуць падкормку траў. На гэтай справе заняты Сяргей Буры (на “Расе” ён уносіць кас), яму дапамагаюць механізатар Анатолій Марцінёнак (дастаўляе ўгнаенне) і запраўшчык, рабочы паляводчай брыгады Мікалай Асташонак. Яшчэ адзін механізатар, Дзяніс Тарасенка, на трактары “Фэндт” з дапамогай раскідвальніка РУ-7000 заняты на ўнясенні калійных угнаенняў. Паралельна з гэтым завяршаецца і вывазка на палі арганікі. Застаецца выгрузіць яе толькі з МТФ “Дамашкі” (у гаспадарцы, дарэчы, пры плане 32,5 тысячы тон на палі дастаўлена ўжо 36 тысяч тон арганікі). Тут у складзе звяна не менш адказныя спецыялісты Аляксандр Хрышчановіч і Віталь Фурс, а таксама Мікалай Белабароды, які займаецца пагрузкай гною на “Амкадоры”.

Аляксандр Хрышчановіч

Гатова да выхаду ў поле і іншая тэхніка. Дарэчы, у апошні час яна тут абнаўляецца – набыты тры новыя трактары, плугі, некаторы іншы навясны інвентар. Зараз адбываецца тэндар на набыццё новага апырсквальніка і васьмірадковай кукурузнай сеялкі. Так што па прычыне зношанасці тэхнікі прастояў быць не павінна, як і яе своечасовым забеспячэнні палівам. Сёння ў гаспадарцы ўсе пільна сочаць за станам надвор’я. Па-першае, мінусавая тэмпература не дазваляе прыступіць да глебаапрацоўчых работ, і, па-другое, запавольвае выхад з зімы раслін. Таму як толькі слупок тэрмометра ўпэўнена стане паказваць днём і ноччу “плюс”, работы будуць весціся самым шырокім фронтам.

Мікалай Белабароды

Анатоль ПАЛЫНСКІ.
Фота Алены ГРОМАВАЙ.