Пакуль праз сродкі масавай інфармацыі нам не даведзены тыя змяненні, якія плануецца ўнесці ў Канстытуцыю, але з выступленняў членаў канстытуцыйнай камісіі ведаем, што і надалей Беларусь застанецца сацыяльна арыентаванай краінай, дзе самым галоўным будзе чалавек працы.

Грамадзянам Беларусі гарантуецца права на ахову здароўя, у тым ліку бясплатнае лячэнне за кошт дзяржаўных сродкаў ва ўстаноўленым законам парадку. У нас будуць замацаваны сямейныя каштоўнасці. Радуе, што прэамбула Канстытуцыі будзе дапоўнена палажэннямі аб захаванні нацыянальнай самабытнасці і суверэнітэту, культурных і духоўных традыцый.

Канстытуцыйна будзе замацавана і роля Усебеларускага народнага сходу. А гэта значыць, што ў вырашэнні праблем краіны змогуць удзельнічаць людзі самых розных сфер дзейнасці.

Лічу, што кожны грамадзянін, беларус павінен прыняць удзел у абмеркаваннні змен, дапаўненняў у Асноўны Закон краіны.

Я, мая сям’я абавязкова будзем прымаць удзел у рэферэндуме.

Алена ТОКАН,
старшыня раённага аб’яднання прафсаюзаў.