Тым не менш, гаспадарка пастаянна знаходзіцца на слыху як адна з лепшых у раёне па вытворчасці асноўных відаў сельскагаспадарчай прадукцыі, як эканамічна моцнае прадпрыемства, якое па выніках сваёй дзейнасці перыядычна адзначаецца граматамі і займае прызавыя месцы ў раённым спаборніцтве.
Вось і сёлета сельгасфіліял трапіў у лік пераможцаў спаборніцтва на жніве і заняў у ім ганаровае трэцяе месца. Адзначым, што адбываецца падобнае не першы раз.
Васіль Рашотка
З якімі ж паказчыкамі завяршылі ў філіяле сёлетняе жніво? З 418 гектараў, занятых збожжавымі і зернебабовымі культурамі, тут атрымалі амаль 1,5 тысячы тон валавога намалоту. Ураджайнасць склала 35,3 цэнтнера з гектара. Убіраць пачыналі не з самых лепшых участкаў, а з тых, што крыху падгарэлі, паступова набіраючы тэмпы работ і прыбаўляючы ва ўраджайнасці. Дарэчы, самымі багатымі на аддачу аказаліся азімая пшаніца і азімае трыцікале (адпаведна 43 і 39 цэнтнераў з гектара), а таксама авёс (54 цэнтнеры) і зернебабовыя – 59,3 цэнтнера.
Віктар Лучына
Уборку вялі трыма камбайнамі, столькі ж было задзейнічана і транспарту на адвозцы збожжа. Найбольшай выпрацоўкі дасягнуў камбайнавы экіпаж у саставе Васіля Рашоткі і Дзяніса Ляховіча. А вось на адвозцы збожжа лідарам стаў Андрэй Грышчанка, які на гэты раз змог абысці свайго колішняга саперніка, неднаразовага тысячніка былых сезонаў уборкі Віктара Лучыну.
Андрэй Грышчанка
- Мець высокі вынік мне сам Бог загадваў, - усміхаецца Андрэй, - бо гэтае жніво я адпрацаваў на новенькім МАЗе, які мы атрымалі мінулай зімой.
Добра стараліся і іншыя работнікі філіяла, якія былі задзейнічаны ў кампаніі.
- У нашым калектыве налічваецца каля 60 працаўнікоў, і кожны з іх заслугоўвае толькі слоў падзякі, - дзеліцца меркаваннямі дырэктар філіяла Сяргей Счасны. – На жаль, вынік нашых намаганняў аказаўся сёлета не такім важкім, як летась. І на тое, як вы ведаеце, былі свае важкія прычыны.
Канстанцін Кухаронак
Для таго, каб налета быць больш падрыхтаванымі да падобнага роду капрызаў надвор’я, мы ўжо сёння зрабілі патрэбныя вывады і прымаем адпаведныя захады. Па-першае, гэта ўнясенне пад поўную патрэбнасць усіх тукаў.
Па-другое, у ходзе догляду пасеваў павінны праводзіцца ўсе віды апрацовак, напрыклад, ужыванне рэгулятараў росту або пазакаранёвыя падкормкі мікраэлементамі пад рапс, каб ён больш моцным ішоў у зімоўку.
Галоўны эканаміст Юлія Гогаль і галоўны інжынер Мікіта Крафт
Па-трэцяе – гэта больш эфектыўная работа па ўнясенні вясной пад пасевы азоту, які дапамагае захаваць вільгаць (гэты нюанс сёлета даволі яскрава паказаў сябе).
Наступны пункт прадугледжвае выкарыстанне толькі высокапрадукцыйнага элітнага насення з высокім патэнцыялам. Для павелічэння валавога намалоту налета планую павялічыць плошчу тых культур, якія былі найбольш ураджайнымі ў папярэднія сезоны (у прыватнасці, гэта трыцікале і пшаніца).
Асаблівую ўвагу, лічу, трэба ўдзяліць культурам, якія з’яўляюцца таварнай прадукцый, у тым ліку і рапсу, асабліва яго гібрыдам. Большую ўвагу будзем надаваць таксама ячменю – як азімаму, так і яравому, бо ён таксама пры добрым доглядзе здольны даваць высокі ўраджай.
Анатоль Калбаска
- Так, таварная прадукцыя раслінаводства плюс жывёлагадоўчая прадукцыя, - працягвае Сяргей Іванавіч, - з’яўляюцца асновай папаўнення нашай казны. Таму паралельна з правядзеннем жніва трымалі пад пільным кантролем і стан работы фермы, забеспячэнне яе пад поўную патрэбу кармамі.
Зараз вось працягваем убіраць кукурузу і закладваем яе ў сянажныя траншэі. Дарэчы, налета планую амаль удвая павялічыць пасяўныя плошчы пад “царыцу палёў”, каб закласці мінімум 10-11 тысяч тон сіласу з яе і забяспечыць жывёлу энергіяй.
Сапраўды, эканоміку будучага года і перспектыву развіцця гаспадаркі ў наступным годзе трэба закладваць і пралічваць ужо сёння, калі на палетках яшчэ ёсць корм для жывёлы, які неабходна ўбраць і захаваць, калі ў самым разгары пасяўныя і глебаапрацоўчыя работы, калі закупляецца насенне і вызначаюцца найбольш спрыяльныя ўчасткі для высеву той ці іншай культуры. Таму ў вяскоўцаў сёння хапае штодзённай работы і клопатаў.
Вось, напрыклад, Анатоль Калбаска. Хоць у жніве ўдзелу ён не прымаў, але ад яго вынікаў напрамую залежыць ураджай у гаспадарцы, бо гэтымі днямі ён на сваім энерганасычаным трактары МТЗ у счэпе з пасяўным агрэгатам заняты сяўбой азімай пшаніцы.
Не сядзяць без справы сёння і іншыя механізатары: той жа Канстанцін Кухаронак, які, лічы, адзін выконвае ўсе хімахоўныя работы, Аляксандр Аўчыннікаў, які ў час жніва паспеў пазавіхацца і на КЗС, і пачаць узорваць вызваленыя ад збажыны палеткі. Добра ўпісаўся ў каманду “Арэшкавіч” за паўтара года работы тут і Іван Патракоў, асноўным клопатам якога з’яўляецца звозка саломы (ён прыбыў сюды з суседняга Барысаўскага раёна і яму ўжо выдзелена жыллё). Набіраецца вопыту практычнай работы і малады галоўны інжынер філіяла Мікіта Крафт.
Іван Патракоў
Развіваецца гаспадарка, не здае сваіх пазіцый, маладзее, пашырае свае ўгоддзі. Так што налета ў філіяла ёсць усе падставы для таго, каб ізноў выйсці ў лік пераможцаў раённага спаборніцтва на жніве.
Аляксандр Аўчыннікаў
*Анатоль ПАЛЫНСКІ.
Фота аўтара.