Шыкоўную канцэртную праграму з выступленнем салістаў і творчых калектываў прадаставіў раённы цэнтр культуры. У выкананні вядомых бярэзінскіх артыстаў гучалі песні, словы і мелодыя якіх не пакінулі раўнадушным нікога.
Асобным радком на мерапрыемстве варта адзначыць выступленне вядучага Аляксея Бабашава, які засяродзіў увагу прысутных на розных аспектах захавання гістарычнай памяці і сэнсу нашай Перамогі, значэння слова Радзіма.
Шматлікія атракцыёны вабілі малодшае пакаленне. Можна было пакатацца з горкі на самакаце і роліках, памаляваць на арт-сцяне, паўдзельнічаць у майстар-класе па стварэнні мастацкіх выбараў. Аматараў дзіцячых татушак чакаў аквагрым.
Для юных і дарослых спартсменаў былі прадугледжаны тэніс, дартс, барацьба на руках і іншыя захапляльныя гульні.
Цікавым пунктам значыўся Бярэзінскі раённы аддзел па надзвычайных сітуацыях, у праграме якога была дэманстрацыя работы вадзяной сістэмы пажаратушэння. Дзеткі былі ў захапленні ад відовішча (дарэчы, дарослыя таксама).
Многіх вабіла магчымасць памаляваць. Арт-сценка вельмі хутка запоўнілася аўтографамі, імправізаванымі эцюдамі, і як асабіста мне падалося, імправізаваным постмадэрнізмам. Напрыклад, дзяўчынка Маша Варабей малявала зорку. А Усціння Захожая разам з татам Аляксандрам старанна выводзілі кветачкі (на фота).
На свяце было шмат цікавага. Агульны настрой узмацняўся яшчэ і спрыяльным надвор’ем. Гледачы канцэрта падтрымлівалі авацыямі артыстаў. У асобным кутку можна было пачаставацца смачным шашлыком. А ў процілеглым сектары тэрыторыі маладыя людзі ўсчалі гульню, падобную на валейбол.
І калі праводзілі галоўную выснову, можна упэўнена сказаць адно: сённяшняе святкаванне Дня Перамогі з’яднала прысутных у адным дыханні і пачуццях, думках і меркаваннях. Не гледзячы на розны сацыяльны статус і род заняткаў, усе прысутныя на свяце нібыта сталі роўнымі, згуртаванымі духам барацьбы з праявамі фашызму і імкненнем замацаваць памяць пра подзвіг нашых гераічных дзядоў і бабуль, дзякуючы якім мы жывём у мірнай прыгожай краіне.
Аднак, чым шмат чытаць, лепш пазнаёміцца з водгукамі прысутных на свяце і паглядзець фотаздымкі.
Анатоль ЗЯБКО:
- Уражанні ад свята цудоўныя, асабліва на мітынгу спадабалася выступленне вядучага, такое эмацыянальнае, добрае, зараджае правільнымі думкамі слухачоў. Не збітымі выразамі, не казённымі, выдатна арганізавана свята.
Васіль КІСЕЛЬ:
- Вельмі ўрачыста. Вельмі добрыя словы былі сказаныя вядучым, вельмі актуальныя. У той час, калі ўся Еўропа забылася пра сваё мінулае, мне думаецца, у яе няма будучыні. Ну а нам трэба помніць подзвіг нашых салдат, каб падобнае не паўтарылася. Са святам усіх!
Алена і Дмітрый ЕРМАКОВЫ:
- Свята – гэта заўсёды добра, і асабліва калі гэта Свята Перамогі. На душы адразу ўзнікаюць радасць і сум, і нават крохі слёзы. Сёлетняе святкаванне арганізавана добра. Нашы дзеткі ўжо выраслі, таму на атракцыёны не ходзім, аднак мы прыйшлі паглядзець канцэрт. Адным словам, вельмі душэўна атрымалася.
Яўгеній КОТАЎ:
- Цудоўнае свята. Шмат людзей вакол з добрым настроем. Мы таксама прыйшлі парадавацца, далучыцца да агульнага святкавання. Адчуванні ва ўсіх выдатныя і лагоднае надвор’е спрыяе. Прыйшлі адзначыць Дзень Перамогі, паслухаць канцэрт, сустрэцца з сябрамі.
Сяргей ПІСКУН:
- Тое, што мы адзначаем Свята Перамогі – вельмі добра для нас, мы помнім наша мінулае. Нашы дзеці прыходзяць сюды і таксама будуць помніць. Нашы бабулі і дзядулі шмат нам расказвалі пра вайну. І мы расказваем нашым дзецям. Усёй з сям’ёй глядзім ваенныя фільмы. Цудоўна, што ёсць такое свята, якое азначае, што мы перамаглі фашызм і нацызм.
Зарына ГОЦМАН:
- Выдатнае свята, цудоўна паслухаць спевакоў, паглядзець канцэрт. Наогул, мне здаецца, актуальнасць Дня Перамогі ніколі не знікне, асабліва гэта слушна цяпер, калі паглядзіш, што робіцца ў свеце. Таму варта помніць, як наш народ перамог у тым моцным супрацьстаянні, каб падобнае не паўтарылася.
Аляксей ЗУБЦОЎ:
- Помню з маладых гадоў, як раней святкавалі Дзень Перамогі. І вось сёння нібыта на хвіліначку вярнуўся ў той час. Усё шчыра, ад душы, з належным размахам. Дзякуй па першае, ветэранам, якія прынеслі нам Перамогу. Дзякуй і арганізатарам і ўдзельнікам сённяшняга святкавання. І дзеткам ёсць чым заняцца, і дарослым цікава паглядзець і паслухаць. Нам з сям’ёй спадабалася!
Аляксандр БЫЧКОЎСКІ.
Фота аўтара.